အကျင့်ပါနေတဲ့လက်နဲ့ အကျင့်ပါနေတဲ့ ပါးစပ်မှာ
စီးကရက်တစ်လိပ်ကို သတိလက်လွတ်မီးညှိမိရုံ . . .
‘ ဆေးလိပ်မသောက်တော့နဲ့ ‘ဆိုတဲ့ အမေ့အတွက်
‘ ဆေးလိပ်မသောက်နဲ့နော်’ ဆိုတဲ့ ညီမလေးအတွက်
စိတ်ကွက်လပ်ကို ဒီအတိုင်း ပြန်ထိုးချေလိုက်တယ် ။
ရင်ဘတ်ချင်းတူတဲ့ သူငယ်ချင်း တစ်ယောက်ကို
အကြောင်းအရာမဲ့ လမ်းခွဲလိုက်သလို ခံစားရတယ်
နံရံမှာ . . . မျက်နှာကျက်မှာ
အဆင်မပြေတာ တွေ့ရင် ခံတွင်းကချဉ်လာတာ
အတူနေတာကြာတဲ့ ချစ်သူတစ်ယောက်ကို လွမ်းသလိုမျိုး
ကျွန်တော်ခံစားရတဲ့ အခါ
ဦးနှောက်က ခဏခဏ ဗလာဖြစ်သွားတယ် ။
ဆေးလိပ်ဆန့်ကျင်ရေး ဦးတည်ချက်မပါ
ဆေးလိပ်မကောင်းကြောင်း အကြောင်းအရာများမပါ
ကျွန်တော့်စိတ်ခံစားချက် သက်သက်ကနေ
ခင်ဗျားစိတ်ခံစားချက်ဆီ လှမ်းပို့လိုက်မိတဲ့
ဗလာသက်သက် message တစ်ခုသာ ဖြစ်တယ် ။
ဘာကောင်မှတော့ မဟုတ်ပါဘူး
အိပ်ရာထတဲ့အခါ စောင်ခေါက်သိမ်းရမှာ ပျင်းတဲ့ကောင်
အပျင်းပြေ လေတောင်ဖြောင့်ဖြောင့်တန်းတန်း မချွန်တတ်တဲ့ကောင်
ဆေးလိပ်နဲ့ ကိုယ့်ကိုပြန်မချစ်တဲ့သူကိုမှ ချစ်ခဲ့တဲ့ကောင်
. . . . . . . . . . . . . . . . အဲဒီလိုကောင်
ဒီတိုက်ပွဲအောင်မြင်အောင် တိုက်နိုင်ခဲ့ရင်တော့ ဂုဏ်ယူမိမှာပဲ
သေချာတယ်
ကျွန်တော် သိပ်ဂုဏ်ယူမိမှာပါ ။
No comments:
Post a Comment